BORRERUAK BADITU MILAKA AURPEGI / KONTRAINFO ANTIFA (Euskal Herria)

Hego Pampa elkartea mobilizatzen ari da 2022an eskuin muturrak tirokatu zuen errugbiko jokalari argentinarraren oroimena bizirik mantentzeko eta bere gertukoei Pariseko Zigor Auzitegian irailaren 7an hasiko den epaiketara joaten laguntzeko.

Tizjan Peron – NAIZ / Kontrainfo Antifa-k euskerara itzulia

Abuztuaren 15eko larunbat batean ere, Biarritzeko Halles inguruan, mundu osoko turistek inbaditutako bainuetxe hiri dotore honen epizentroan, gauza batzuk ez dira aldatzen. Kafetegietako terrazetan Biarritz Olympique (BO) errugbi talde historikoaren jokalari eta zale ohiak daude: elkar agurtu, sorbaldan zapladak eman eta irribarre egiten dute.

Baina duela aste batzuetatik hona, elementu berri bat sartu da paisaian. Le Comptoir du Foie Grasen aurrean, auzoko supermerkatu txikiaren ondoan, kolorez betetako mural bat agertu da. Bertan, Federico Martín Arambururen aurpegia, Euskal Herriko eta Argentinako banderak eta Loïk Le Priolek 2022ko martxoaren 19an Parisen tiroz hil zuen jokalariaren bizitza gogorarazten duten beste ikur batzuk ikusten dira.

Eskuin muturreko militantea irailaren 7tik aurrera epaituko du Parisko Zigor Auzitegiak, Romain Bouvierrekin batera, Biarritz Olympiqueko jokalariaren heriotza nahita eragiteagatik. Bi gizonak «taldean eta armaz areagotutako indarkeriagatik» epaituko dituzte, Shaun Hegartyren aurka. Shaun Hegarty taldekide ohia, negozioetan bazkide izandakoa eta gau hartan berarekin zegoen Arambururen laguna zen.

«Hori guztia bidegabekeria-sentsazio batetik sortzen da»

Horma-irudiaren aurrean, larunbat goizero, Hego Pampa elkarteak mahai bat jarri eta zapi gorriak jartzen ditu, Baionako Bestetan milaka ikusten direnak, Argentinako bandera batekin estanpatuak eta «Fede 13» inskripzioa, Argentinako selekzioan zein BOn erdigune gisa zeraman kamiseta zenbakia.

«Ia iruditzen zait horrelako ekimenak abian jartzeko eskaria zegoela. Denbora bat generaman ideiari bueltak ematen. Hori guztia, nolabait, injustizia sentsazio batetik sortu da», azaldu du Pierre Guerinek, Federico Mart ‘n Arambururen lagun ohiak eta joan den uztailaren 7an sortutako elkarte honen sustatzaileak.

Hilabete baino gehiago daramate hainbat lagunek Argentinako zapiak eta ardo botilak saltzen, baita partikularren eta kirol kluben dohaintzak jasotzen ere, «Fedek utzitako ondarea bizirik mantentzeko: Argentina eta Frantziaren artean zubiak eraikitzea eta errugbiaren balioak bizirik mantentzea».

Dagoeneko 1.500 zapi baino gehiago saldu dira, bakoitza 10 eurotan, hein handi batean HelloAsso online plataformaren bidez. Baionako Besten arrakasta hain handia izan da, non eskaera batzuk Bretainiatik, Kosta Urdinetik edo Parisko eskualdetik iristen diren. Datozen egunetan baloiak eta kamisetak ere agertuko dira.

Omenaldia denboraldiaurreko lehen partidan

Hego Panpak bildutako diruaren zati bati esker, Atlantikoaren beste aldetik epaiketara joan ahal izango dira Arambururen senideak. Hiru aste iraungo du epaiketak Parisen. «Familiari laguntza logistikoa eskaini nahi diogu hegazkin-txarteletarako eta ostaturako, bere beharren arabera», zehaztu du Guerinek.

Abuztuaren 14an, ostiralean, BO eta Perpignanen arteko partiduan, denboraldiaurreko lehenengoan, zapiek harmailak bete zituzten. Bere kirol ibilbidean zehar, «Fede» bi klubetatik igaro zen.

Partida hasi aurretik omenaldia egin zitzaion lehengo jokalariari, eta Aguilera estadioko harmailetako batean zuri-beltzean ere ageri da haren aurpegia. Handi-BO elkarteak 3.000 euroko txekea eman zion Hego Panpari, eta Cyril Arrosteguy klubeko presidenteak hitz batzuk esan zituen elkartearen lana aitortzeko eta babesteko.

Datorren larunbatean, Pierre Ranchou, «RIP Frère d ‘ovalie» (2024, autoedizioa) polizia-eleberriaren egile landarra, fikziozko liburu honen aleak sinatzera joango da. Irabazien zati bat Hego Pampara bideratuko da. Topaketa 11.00etatik 13.00etara izango da Las Halleseko horma-irudiaren aurrean eta ondoren Le P ‘tit Coin tabernan jarraituko du.

Irailaren 14an eta 15ean, Pierre Guerinek mobilizazio garrantzitsu bat ikusi nahiko luke Parisko Zigor Auzitegian. «Gure balioak errugbiarenak dira. Kirol honetan, mundu guztia onartzen da, historia, tamaina edo izaera gorabehera. Nire amets sekretua auzitegiaren aurrean zapi gorrien marea egotea da», esan du, hunkituta, Hego Panparen sortzaileak.