BORRERUAK BADITU MILAKA AURPEGI / KONTRAINFO ANTIFA (Euskal Herria)

Kaleko Afari Solidarioetara bertaratzen eta bideoak grabatzen aritu dira, udaltzainei deitzeko eta ekimena «problematiko» modura saltzeko. Udalak afariak debekatu izana txalotu du PPk: «Ongi etorri argira, bazen ordua, sei urteko atzerapena daramazue».

Dorleta Agiriano-ren testua / GEDAR Langile kazeta

Donostiako Udalak (EAJ-PSE-EE) Kaleko Afari Solidarioak (KAS) debekatu izanak badu testuinguru bat: PP alderdiko zinegotziek (tartean Borja Coromiras) eta euren eskutik doan Lo que no te cuentan de Donosti (LQNTCDD) dibulgazio-kanala kudeatzen duten pertsonek asteak daramatzate afarietara hurbiltzen, euren kriminalizazio-kanpaina indartzeko. KASeko boluntarioek eman dute horren berri.

Donostiako hiru lekutan banatzen ziren afari solidarioak gaur egun, besteak beste, Gipuzkoako Foru Aldundiaren egoitzaren aterpean. Bada, PPkoak eta LQNTCDDkoak astero-astero egon dira aldundian ematen diren afarietara bertaratzen, ekimena «problematikotzat» saltzen saiatzeko: janari bila hurbiltzen ziren pertsona etorkinak grabatzen aritu dira, haiek seinalatu ahal izateko eta udaltzainei deitzeko aitzakia bat edukitzeko. Horren helburua argia izan da: Kaleko Afari Solidarioak kriminalizatzea, elkartasun-ekimenaren debekuari bide egiteko.

Kanpaina horren barruan, PPk denbora zeraman Donostiako Udalari eskatzen afari solidarioak debekatu zitzala, «segurtasunari» lotutako arrazoiak argudiatuta: elkartasun-ekimena «segurtasun» arazoen iturri bailitzan seinalatu dute faxistek. Ekainean, PPk afariak debekatzeko mozio bat aurkeztu zuen udalean, baina ezetz bozkatu zuten bai EAJk bai PSE-EEk. Handik hilabetera, jarrera aldatu dute udal-gobernuko bi alderdiek: Kaleko Afari Solidarioak debekatzeko ebazpen bat onartu dute, PPk mahaigaineratutako argudioak erosita eta faxistei men eginda.

Coromirasek harrokeriaz txalotu du neurria sare sozialetan: «Ongi etorri argira, bazen ordua, sei urteko atzerapena daramazue». Izan ere, sei urte dira Donostiako boluntario-sare handi batek afari solidarioak banatzen dituela kaleetan, muturreko pobrezia-egoeran dauden ehunka pertsonei otordu bat bermatzeko. Gaur egun, 300 bat lagunek dute afaria horri esker, eta udalak ez du inolako alternatibarik eskaini haientzat, Kaleko Afari Solidarioak debekatu ondoren.