ARGIA aldizkaria
1984ko azaroaren 20an, Santi Brouard hil zuen Bilbon GAL talde parapolizial faxistak. Bere mediku kontsultan sartu ziren bi pistolari, haur bat artatzen ari zela, eta erizaina baztertuta zortzi tiro jo zizkioten. HASI alderdiaren lehendakaria eta Herri Batasunaren Legebiltzarreko bozeramalea izan zen.
Lekeition jaioa, medikuntza ikasi zuen Valladolideko unibertsitatean. Behin ikasketak burututa, Euskal Herrira itzuli zen, eta pediatriako espezializazioa egin zuen Basurtuko Ospitalean. Garai hartan, Bizkaiko lehen ikastolak sortzen lagundu zuen.
1974an Espainiako Poliziak tirokaturiko etakide bati laguntzeagatik, Ipar Euskal Herrira ihes egin behar izan zuen. Han, harremana izan zuen etakide historikoekin, adibidez Argalarekin. Erregimen frankistaren amaiera aldera, KAS alternatiba taxutzeko lanetan parte hartu zuen. Brouard EHASeko sortzaileetako bat izan zen (1977tik aurrera HASI izan zena). Brouard bera HASIko lehendakari izendatu zuten eta Herri Batasuna sortutakoan, alderdi horretako kide izan zen.

Erbestetik itzulita, bere mediku lanarekin segitu zuen, politikarekin uztartuz. 1983ean kartzelan sartu zuten, Espainiako errege Juan Carlos I.ak Gernikako juntetxera egindako bisitaldian Eusko gudariak abestu zuelako Herri Batasuneko beste kideekin batera. Herri Batasuneko mahai nazionaleko kidea izan zen, eta alderdi horretako diputatu Madrilgo gorteetan. Horrez gain, agintaldi batez Bilboko alkateorde izan zen.
1984eko azaroaren 20ean, Luis Morcillok eta Rafael López Ocaña mertzenarioek tiroz hil zuten bere pediatriako kontsultan. Hilketa hura egiteko eguna ez zuten ausaz aukeratu: egun horretan bertan hilak ziren, urte batzuk lehenago, José Antonio Primo de Rivera eta Francisco Franco.
Ondorengo ikerketek bi hiltzaileak identifikatu eta auziperatu zituzten, baina Espainiako Auzitegi Nazionaleko epaile batek libre utzi zituen 1999an. Hainbatek salatu zutenez, hilketa hura Espainiako Gobernuak 1980ko hamarkadan aurrera eramandako estatu terrorismoaren operazioetako bat izan zen.

Luis Morcillok 2013. urtean aitortu zuenez, berak egin zion tiro Brouardi, eta Guardia Zibileko teniente koronel Rafael Masak eman zuen hilketa egiteko agindua. Brouard hiltzearen trukean, Espainiako Barne Arazoetako Ministerioak 25 milioi pezeta (150.000 euro) ordaindu omen zizkien hiltzaileei; horietatik 5 milioi (30.000 euro) Morcillorentzat izan omen ziren.
Bideo honetan ikus daitezke beren omenaldi eta agurreko irudiak, baita handik bi egunera deitu zen bi eguneko greba orokor oso istilutsua ere.

1989ko azaroaren 20an, Josu Muguruza Herri Batasunako (HB( Espainiako Kongresuko diputatua hil zuten Madrilen, Iñaki Esnaola zauritu zuten atentatu berean.
Bilboko Errekaldeberriko auzoan jaio zen 1958an. Deustuko Unibertsitatean Pedagogia ikasten hasi ondoren, EHUn kazetaritza ikasi zuen. Ordurako euskara ikasia zuen eta ASK-ko militantea zen. 1981ean, Espainiako Poliziak bere bikotekidea zen Elena Bartolome atxilotu ondoren Ipar Euskal Herrira ihes egin zuen.
Erbestean egondako denboran AEK-ko irakasle izan zen Baionan. Horrez gain, Gure Irratia irratian poesiari buruzko programa bat zuzendu zuen eta Egin egunkariko korrespontsala izan zen. 1984ean Errefuxiatuen Komiteko antolatzaileetako bat zen GAL-en urterik odoltsuenetan. Egin egunkarian astero zutabe bat idazten hasi zen, Zihordia ezizena erabilita. ARGIAko kolaboratzaile fina zen Muguruza eta euskarazko prentsaren bultzatzailea.
Ipar Euskal Herrian sei urtez bizi eta gero, 1987ean Frantziako Poliziak atxilotu eta Espainiara eraman zuten. Donostiako eta Madrilgo kartzeletan egon eta gero, hilabete gutxiren buruan libre utzi zuten. Euskal Herrira itzulitakoan, Herri Batasuneko mahai nazionalean parte hartzen hasi zen. Horrez gain, Egin egunkarian lanean hasi zen berriz ere, eta politika ataleko kronikak idazten zituen Iratzar ezizenarekin. Aljerko elkarrizketen prestaketan jardun zuen pertsonetako bat izan zen.
1984ko azaroan Tasio Erkizia ordezkatu zuen Madrilgo gorteetan Herri Batasuneko diputatu moduan. 1989ko azaroaren 20ean, Madrilgo Alcala Hotelean bere alderdiko beste kide batzuekin parlamentuko lana prestatzen ari zirela, armaturiko bi lagun sartu eta tiro egin zioten. Bertan hil zuten.

Bost urte lehenago Santi Brouardekin gertatu bezala, erailketarako aukeraturiko eguna ez zen kasualitatea izan: Francisco Franco eta Primo de Rivera hil ziren eguna zen azaroaren 20a.
Hilketak Euskal Herri osoan greba orokorrerako deialdia sorrarazi zuen. Hileta oso jendetsuak egin zituzten Bilbon.


Bi egunen biharamunetan greba orokorrak deitu zituzten Euskal Herrian eta istilu gogorrak izan ziren Poliziarekin.









Deja una respuesta