INFO ANTIFA (Euskal Herria)

200 lagun inguruk manifestazioa egin zuten atzo Baionan (Lapurdi) arrazakeriaren eta faxismoaren aurka, Etorkinekin Diakité federazioak deituta. Martxak egungo giro politikoaz kontzientziatu nahi zuen, arrazakeria orokortzen ari baita, eta elkartasunaren alde egin, bitarteko eta helburu gisa.

Etorkinekin Diakité elkarteak bat egin zuen bat Estatu frantzes osoko 340 kolektibok, sindikatuk eta elkartek babestutako Elkartasunaren Martxaren inguruan egindako deialdiarekin, «Ez arrazakeriari, ez faxistei, ez estatu-indarkeriari» lelopean.

Baionan, manifestariek giza katea osatu zuten Nive ibaiaren inguruan, Marengo eta Pannecau zubien artean.

Etorkinekin Diakité elkarteko ordezkariek frantziar Estatuko hainbat tokitan eginiko manifestazioen mezu komuna helarazi zuen. Zehazki, «eskuin muturraren gorakadak gure askatasunak gero eta gehiago mehatxatzen dituen testuinguru bat» salatu zuten. Arrazakeriaren aurrerapenaren eta arrazakeriaz elikatzen diren taldeen aurrean, Baionako giza kateko kideek «elkartasuna bitarteko eta helburu gisa» aldarrikatzen dute.

Manifestariek «guztiontzako eskubide berdintasuna» eskatu zuten, etxebizitzan, arreta medikoan, erretiroan, hezkuntzan edo enpleguan, baita «agiririk gabeko etorkin guztiak erregularizatzea, inoren kargura ez dauden adingabeak aitortzea eta egoitza-baimenak automatikoki berritzea» ere. Era berean, «Darmanin legea eta Retailleau zirkularrak indargabetzeko» eskatu zuten, bizileku-eskubidea lortzeko baldintzak gogortu baitituzte.

Kontsigna antikapitalistak migratzaileekiko elkartasun mezuekin konbinatu ziren.

Etorkinekin Diakité-k hitz bakarrean laburbiltzen du immigrazioaren aurkako Estatuko araudien aplikazio praktikoa: «Jazarpena». Migratzaileak inoiz baino gehiago kontrolatzen eta baztertzen dituzte mugetan. Ekintzaileek «guztion eskubideen, giza duintasunaren, berdintasunaren eta askatasunen errespetuan oinarritutako harrera-politika» eskatzen dute.